Un portal internet per l'occitan, perqué ?

Las iniciativas en occitan e per l'occitan son fòrça nombrosas sus internet. Mas son pas religadas entre elas e ne cal, de paciéncia a l'intenaute, per tot trobar un a un. Un portal internet que federe las melhoras iniciativas del domeni fa mestièr e que renda compte de l'ensemble del mond occitan amb sa diversitat, aquò, ara, es una vertadièra necessitat. La mesa en linha de La Pòrta D'Òc ofrirà aquel servici, accessible a cada internaute, dobèrt cap a totes los estatjants del planeta que pòdon passejar per la tela. I trobaràn, sens gastar tròp de temps, las donadas que cèrcan.

Un portal internet per l'occitan, per qual ?

Los premièrs interessats son los actors de terrenh que meton lor energia al servici de l'occitan. Tendràn a posita un luòc ressorça en linha ont trobaràn d'informacions fisablas e de documentacion de qualitat.

En occitan, quand picam a la pòrta de qualqu'un, la persona que dobrís vos ditz "acabatz d'intrar!". E aquò es tras que logic, que al intrar en cò de qualqu'un fasèm la darrièr pas d'un percors intencional. Aital serà tanben pels vesitaires de La Pòrta D'Òc. A cadun tre ara, disèm "acabatz d'intrar!".

Quand dobriràn la Pòrta D'Òc, los estudiants e los cercaires auràn l'accès en fisança a de donadas que seràn pauc a pauc enriquesidas amb lo temps.

Los escolans, los collegians, los liceans que passejan per internet en classa traparàn mai aisidament l'ajuda en linha que lor fa mestièr quand preparan de devers o d'expausats.

Los que son curioses, los neofits o los estatjants novelament installats en país d'òc auràn pas qu'una pòrta de passar per trobar d'explicas e d'informacions preciosas que lor donarà la capacitat de mièlhs legir e entendre la region ont vivon.

Quin contengut ?

Coma cada portal internet, la primièra vocacion d'aquel d'aquí es de permetre d'accedir a partir d'una sola adreça a mai  de 1200 sits en occitan e per l'occitan. Aquel servivi principal se completarà per un autre, ont accediretz directament a de donadas de mantun domeni qu'interessaràn los internautes. Aquel segond nivèl, de natura cooperativa, serà enriquesit progressivament amb las contribucions volontàrias dels internautes. Aquelas contribucions passaràn per una validacion que ne garantirà la fisabilitat e lo seriós.

Un projècte cooperatiu

La region vinhairona ont sèm a inventat, un sègle a, las cooperativas agricòlas e ne pòt èsser fièra. Aquel afogament per l'òbra cooperativa es plan occitan : baste que parlem de la classa cooperativa de Celestin Freinet ! Es una bona rason per pensar qu'un portal internet per l'occitan a de foncionar d'un biais cooperatiu. La dobertura al mond de La Pòrta D'Òc estrena la naissença d'un espaci novèl de cooperacion que caldrà co-bastir, virtual aquel espaci, que farà flòri demercé los apòrts en produccions intellectualas de contribuidors volontaris.

Vaquí cossí serà estructurat :

	los internautes non-identificats poiràn soncament consultar lo portal
	los internautes identificats auràn la possibilitat de sasir, dins un formulari, de criticas de libres, de disques, de DVD o d'espectacles vius en occitan. Se poiràn abonar a la letra d'assaber (newsletter). Los qu'o desiran poiràn senhalar per corrièr electronic una actualitat o un eveniment de publicar dins l'agendà.
	de contribuidors se cargaràn de fornir regularament de contenguts al referent de lor tematica. Prepausaràn de fichas documentàrias, de fotografias, de logicials revirats, de podcast, etc.
	un referent per tematica capdèla lo sieu domeni. N'a la responsabilitat e decidís quinas contribucions se pòdon metre en linha. Garantís la qualitat e la fisabilitat de las donadas publicadas dins la tematica.
	un Comitat de pilotatge interregional supervisa lo foncionar del portal e contraròtla, "in fine", la coeréncia, la qualitat e la fisabilitat de las donadas mesas en linha. Lo Comitat de pilotatge garantís lo respècte dels objectius del portal. Es fòrça de proposicion per d'evolucions a venir.
	un Comitat scientific donarà un vejaire cap a la qualitat dels contenguts.

Una iniciativa de la Region Lengadòc-Rosselhon

Lo problèma principal, per l'occitan, es dempuèi longtemps que degun, dins los estancis del poder, n'es d'a plen responsable.
Lo President de la Region Lengadòc-Rosselhon, Georges Frêche, a escrich en 2004 que « Lenga e cultura occitanas devon èsser granda causa regionala. ». Es un pas important que s'es concretizat amb la granda CONSULTA qu'a fach a l'encòp un estat de luòc, un diagnostic e de proposicions d'accions per l'occitan. La Pòrta D'Òc ven completar los espleches estructurants meses al servici de l'occitan.
Cal rementar que l'occitan es una lenga que l'UNESCO classifica demest las que son mai menaçadas en Euròpa. E l'occitan es de segur un afar de la responsabilitat dels estatjants de ... Lenga-d'òc!